Fjórir starfsmenn Háskóla Íslands hlutu á dögunum viðurkenningu fyrir lofsvert framlag í starfi við skólann á sviði kennslu, rannsókna, jafnréttismála og annarra starfa. Viðurkenningarnar voru afhentar á upplýsingafundi rektors fyrir starfsfólk.
Einn af þeim sem fengu viðurkenningu að þessu sinni er Pétur Henry Petersen, prófessor við Læknadeild á Heilbrigðisvísindasviði Háskóla Íslands, en hann hlýtur viðurkenningu fyrir lofsvert framlag til kennslu. Hann lauk doktorsprófi í sameindalíffræði og taugavísindum frá Yale-háskóla í Connecticut í Bandaríkjunum og var ráðinn lektor við Háskóla Íslands 2009, dósent 2012 og prófessor 2020.
„Pétur Henry hefur verið mjög virkur í margvíslegri kennsluþróun á undanförnum árum. Hann hefur beitt sér í umræðu um kennslumál á vettvangi Læknadeildar og Heilbrigðisvísindasviðs, hefur unnið að innleiðingu kennsluforrita og setið í kennsluráði og kennslumálanefnd sviðsins. Hann hefur einnig lagt sig sérstaklega eftir fræðilegri hlið kennslunnar og hefur lagt stund á nám í kennslufræði fyrir háskólakennara sem hefur eflt hann til kennsluþróunar. Pétur hefur haft frumkvæði að breytingum á námi læknanema og annarra heilbrigðisvísindanema og m.a. þróað nýjar leiðir til að virkja nemendur í námi sínu. Hann hefur tekið þátt í þróun lausnaleitarnáms (e. problem based learning) í Læknadeild í því skyni að tengja það betur við grunngreinar og almenna þætti í þjálfun læknanema. Slík kennsla er mjög nemendamiðuð og eflir færni nemenda í að samþætta nám sitt,“ segir m.a. í umsögn valnefndar um Pétur Henry.
Þá er bent á að Pétur Henry hafi lagt sig fram um að tengja kennsluna við framtíðarstarf nemenda enda hafi þeir jafnan mikinn áhuga á klínískum tengingum þótt oft reynist örðugt að koma til móts við það í grunnnámi. „Loks hefur Pétur Henry gert tilraunir með fjölbreyttara námsmat en almennt tíðkast með því að byggja á verkefnum fremur en lokaprófi og með því að nota einkunnina staðið/fallið í stað tölulegrar lokaeinkunnar sem beinir sjónum frekar að inntaki námsins og þýðingu þess. Slíkar og aðrar breytingar hvetja í sjálfu sér til umræðu um kennslumál og hvernig best megi tryggja gæði menntunar. Í stuttu máli hefur Pétur Henrý hvatt til umræðu um kennslu, tekið þátt í umræðu um kennslu, haft frumkvæði að bættri eða breyttri kennslu og þannig unnið á fjölbreyttan hátt að auknum gæðum náms.“
Sjálfur sagði Pétur Henry við þetta tilefni: „Áskoranir í kennslu í dag eru fjölmargar en kennarar hafa sem betur fer stuðninginn og tæknina til að bregðast við þeim. Oft kallar það á nýja eða breytta hugsun bæði hjá bæði nemendum og kennurum – en þar liggja tækifærin.“
